கலைகள் காட்சி யென்று கபடப் பெயரை வைத்து
விலைக்கு மேனி காட்டும் வேசி நடனத்தாலே
இளைஞர் மனதைச் சுண்டி இழுத்தே பணத்தைச் சேர்க்கும்
சலுகை அடைந்தோர்க்கெல்லாம் தமிழகம் மேய்ச்சல் காடு !
பகையை அகத்தில் தேக்கிப் பாசம் முகத்தில் காட்டிக்
குகைக்குள் இருட்டைப் போல கொள்கை வளர்த்துக் கொண்டு
மகளிர் கற்பை விற்று மாசு படிய வைக்கும்
தகுதி யுடையோர்க்கெல்லாம் தமிழகம் மேய்ச்சல் காடு !
சாதி மதங்கள் சேர்ந்த சகதி பூசிக் கொண்டு
நீதி தலைகீ ழாக நேர்மை கெடுத்து விட்டு
போதை வர்த்தை சொல்லிப் பொருளைச் சுருட்டி வாழும்
சாத கத்தைப் பெற்ற தமிழகம் மேய்ச்சல் காடு !
காமம் பணமே சேர்ந்து காந்த மாகும் வாழ்வில்
காமம் முலாய் வைத்துக் காசை மூட்டை கட்டிப்
பாம ரர்கள் நெஞ்சில் பாழும் நஞ்சைத் தூவும்
ஆமாம் சாமிக் கெல்லாம் தமிழகம் மேய்ச்சல்காடு !
கட்சி சாயம் காட்டக் கழுத்தில் துண்டைப் போட்டே
எச்சில் கதைகள் பேசி, எதையும் முடிப்பே னென்று
பச்சைப் பொய்யைச் சொல்லிப் பணத்தைச் சுருட்டிக் கொள்ளும்
நச்சுப் பாம்புக் கெல்லாம் தமிழகம் மேய்ச்சல் காடு !
கடத்தல் கள்ள நோட்டுக் கலையை வளர்த்துக் கொண்டு
பிடித்தோர் பிடியை நீக்கப் பெரிய தொகையைத் தந்து
தடுக்கும் வழக்குப் போட்டால் சட்டம் வளைய வைக்கும்
தடத்தில் நடப்போர்க் கெல்லாம் தமிழகம் மேய்ச்சல்காடு !
நாட்டைச் செம்மை செய்ய நானோர் தலைவ னென்றே
கூட்டம் சேர்த்துக் கொண்டு குழப்பம் கொள்கையாக்கி
வீட்டைச் செல்வமாக்கும் விளம்ப ரத்தில் தேர்ந்த
சாட்சி யாவோர்க் க்கெல்லாம் தமிழகம் மேய்ச்சல் காடு !
முத்தமிழ்ப் பேராசான்
திருச்சி தியாகராஜன்
0 comments:
Post a Comment